Бишкек, 15- март. (Zpress.kg).Кыргызстандын Каржы министрлиги Россия менен  түзгөн келишимге ылайык, 300 миллион  доллар россиялык кредит үчүн  1 млн. 131 миң  250 доллар пайыздык төлөмүн которду.  Бул тууралуу КРнын президентинин катчылыгынын басма сөз кызматынын маалыматтык коштоо тобунун жетекчиси Дина Маслова маалымдады.

Эске салсак, Россиянын Кыргызстанга  300 млн. доллар өлчөмүндөгү жеңилдетилген кредит берүүсү тууралуу келишим 2009-жылдын 3-4-февралында Россиянын президенти менен Кыргызстандын президентинин эки тараптуу жолугушуусунун учурунда жетишилген.

Аталган каражаттарды Россия КРнын Каржы министрлигине 2009-жылдын 30-апрелинде которуп берген.

Келишимге ылайык, Кыргызстан жыл сайын 0,75% пайыздык каражатты үстөккө төлөөгө тийиш. Муну менен негизги карыз боюнча биринчи төлөм 2016-жылы аяктап, ал эми акыркысы 2049-жылы соңуна чыкмакчы. Пайызды төлөөнү кыргыз тарап ар бир жарым жылда мартта жана сентябрда жүргүзмөкчү.

Каржы министрлигинин  маалыматына таянсак, биринчи пайыздык төлөм 15- сентябрда төлөнүп, Россияга 868 миң доллар которулган.

Россиялык кредиттин 286,3 млн. доллары  КРнын Өнүгүү фонду тарабынан республика үчүн келечектүү болгон долбоорлорго бөлүнгөн. Белгилей кетчү жагдай кредиттик келишимдин негизинде 13,6 миллион доллар Россиянын  Внешэкономбанкына депонирленген. Бул 2016-жылы бүтө турган негизги карызга кыргыз тараптын  биринчи төлөмүнүн кепилдиги катары салынган.