Бишкек, 15- март. (Zpress.kg).Кыргызстандын премьер-министри Данияр Үсөнов  Нарын  областындагы Аксай жана Арпа жайыттарынын Кытайга берилиши тууралуу кепти четке какты.Бул тууралуу өкмөт башчы бүгүн журналисттер менен болгон жолугушуу учурунда билдирди.
Д. Үсөнов белгилегендей, ал өткөн жуманын соңунда Нарын областынын бул маселе тууралуу кайрылган жашоочулары менен жолугушкан.

Анын айтымында, 1996-жылы Кытай менен Кыргызстан чегара боюнча баардык талаш маселелерди чечүү үчүн келишимдик процессти жыйынтыктаган.”Муну менен биздин чегаранын баардык параметрлери такталган. Сүйлөшүү процессинде талаш жерлердин 70%ы Кыргызстан, ал эми 30%ы Кытай тарабына чечилген”,-деп белгиледи премьер-министр.

“1996-жылдан бери Кыргызстан да, Кытай да келишимдин кайсы бир пунктун өзгөртүүнү ойлогон жок жана бүгүнкү күндө биз кыргыз-кытай чегин кайра карап чыгууга киришкенибиз жок”,-деди Д.Үсөнов.  

Анын айтымында,  учурда Кыргызстан Өзбекстан жана Тажикстан менен гана делимитация  иштерин жүргүзүп жатат. Ал эми Казакстан менен талаш участоктор жок, болгону демаркация прецесстери жүргүзүлүүдө.

Премьер-министр: “Талаш участоктордун көбү Өзбекстан менен байланышкан, ушул жылдын апрель айынан баштап чегараны делимитация жана демаркациядоо тууралуу маселени баштоону сүйлөштүк. Процесс абдан оор, бирок мага ишенип коюңуздар кыргыз жеринин бир чарчы метрин да бербейбиз”,-деп билдирди.